भक्तपुर असार, २९ गते २०८२
मनसुनजन्य विपद पुर्वतयारी सम्बन्धमा पत्रकारहरुसंग सरोकारवालाहरुको छलफल कार्यक्रम सम्पन्न भएको छ । जिल्ला प्रशासन कार्यालय भक्तपुरको आयोजनामा भएको कार्यक्रममा कार्यालयबाट बाढी र डुबानका क्षेत्रहरुको बारेमा प्रस्तुति गरिएको थियो । भक्तपुरमा रहेका चार वटा नगरपालिका भक्तपुर नगपालिका, मध्यपुर थिमी, सुर्यविनायक र चागुनारायण भित्र बाढी डुबान पहिरोमा पर्न सक्ने जोखिमयुक्त क्षेत्र तथा प्रभावितलाई स्थानान्तरणको सम्भावित वैकल्पिक स्थानहरु, खुला क्षेत्रहरुको विषयमा जिल्ला प्रशासन कार्यालयका सहायक सिडियो चिरञ्जीवी भण्डारीले जानकारी गराउनुभएको थियो ।
साथै कार्यक्रममा चार वटा नगरपालिका, शसस्त्र प्रहरी, नेपाल प्रहरी, नेपाल आर्मी, डिभिजन सडक कार्यालय भक्तपुर, विधुत प्राधिकरण, नेपाल टेलिकम, सरकारी अस्पताल, नेपाल रेडक्रस सोसाइटी, गैर सरकारी संस्था महासंघ भक्तपुर, जिल्ला जन स्वास्थ्य भक्तपुर, र सिचाई डिभिजनका प्रतिनिधिहरुले विपद व्यवस्थापनका विषयमा के कस्ता तयारी भएका छन् सो बारेमा समेत जानकारी गराइएको थियो ।
जिल्ला प्रशासन कार्यालय भक्तपुरका प्रमुख भरत मणि पाण्डेले विपद व्यवस्थापनमा सबै सम्बन्धित निकायहरु सक्रिय रुपमा लाग्न अनुरोध गर्नुभयो । जोखिम न्यूनीकरण गर्नका लागि जिल्ला प्रशासन सक्रिय भएको कुरा जानकारी गराउदै विपदको समयमा सम्बन्धित सबै संघसंस्थाहरुको साथ र सहयोगद्वारा जोखिम न्यूनीकरण गर्न सकिने बताउनुभयो ।